ROTEIROS - Arumes de pensamento crítico

Como xa dixemos o número actual de Roteiros tratou, de xeito central, a interculturalidade. Este concepto ten tanta importancia que pode ser aplicado á ciencia, falando entón de ciencia intercultural. Esta supón unha alternativa ao positivismo —do mesmo xeito que a corrente CTS—, no sentido dunha ciencia tentativa ou postnormal. Amais, implica a aceptación das influenzas culturais na produción científica e viceversa. Doutra banda, supón un certo enfoque constructivista xa que ten moi presente a perspectiva cultural e imaxinaria da mesma. O enfoque intercultural cuestiona a occidentalización da ciencia procurando chegar a un sistema científico máis global. A nivel curricular implica unha orientación centrada no escenario sociocultural do que está aprendendo. Ideoloxicamente, leva a defensa da equidade social, da solidariedade, da tolerancia, etc. 

Os pasados días 27 e 28 de febreiro tivo lugar o encontro “La hermenéutica analógica en España” no Instituto Superior de Filosofía. Nel comprobouse que a Hermenéutica Analóxica é unha proposta filosófica alternativa e resistente aos excesos da bipolarización da cultura contemporánea.

A intervención de Mauricio Beuchot fixo ver que non se trata dunha vía de pensamento improvisada se non que se atopa sustentada en argumentos histórico-filosóficos. Son xa moitas as disciplinas que se poñen a funcionar dende os presupostos da HA, como expuso Justino López na súa síntese bibliográfico-receptiva. No encontro puidemos corroborar cómo o dereito (Napoleón Conde) e a xustiza (José Carlos Muinelo); o arte (Sixto J. Castro) e a representación (Lourdes Otero e Pilar Mancebo); a actividade tecnocientífica (Juan R. Coca) e a antropoloxía (Pedro Herráiz); a retórica (Francisco Arenas-Dolz) e incluso os cuestionamentos e retos que se lle poden presentar dende a relixión (Miguel Ángel Quintana) e dende o espírito tráxico que latexa na propia analoxía (Joaquín Esteban) poden axudar a daren inda máis consistencia a estes plantexamentos.

Para coñecer un pouco que di a Hermenéutica Analóxica ao respecto da concepción do ser humano, poderemos ler un interesante artigo no vindeiro número de Roteiros.

A comezos do ano 2004 morreu Norberto Bobbio, posiblemente o mellor teórico da política na Europa do Sur desde a posguerra. As súas lúcidas e certeiras reflexións sobre a natureza e os problemas da democracia resultaron en ocasións anticipativas da praxe política.
É un bo momento para lembralo lendo o artigo de Moisés Lozano en Roteiros.